زاهر بخيت الفكي يكتب يا ولدي جدّد توبتك..!!

حلفّت قِدامنا اليمين
أقسمت بالحقِ المُبين
تخشى الإله فى مهنتك
ترعى الوطن
ليهو تبذِل خبرتك
عاهدتنا
تحفظ وصايا أبوكا ليك
والوالدة أيضاً وصّتك
خليك أمين
لا تتبع ابليس اللعين
صون أمانتك يا الخزين
لا تُتهم فى ذِمتك
مبسوطة ليك أنا يا جناي
دايراك تحقّق لى مناي
يا ولدي شان تكسب رضاي
واعمل حساب لاخرتك
ممّا خلاص بقوك مُدير
نسيت وصايانا القبيل في مِحِلّتك
عامِل دوام مشغول كتير
البيت مِحرِّسوا لى غفير
لا زول يجيك لا اتصال
غيرّت شكلك ومشيتك
همك بقيت تجمع فلوس
كُل حين تغيِّر ليك عروس
رميت زمان بت عمّتك
شان وصّتك
قاتليكا ما تاكل الحرام
كانت غُتاكا وسُترتك
سكنت فى عالي القصور
أصابك التيه والغرور
سبحت في بركِ الفُجور
والحال مُحال لي زول يدوم
يا ولدي جدّد توبتك
لى ربي مولاي الغفور
يصلح لدينك ودُنيتك
الجريدة